Psa 72 | YON | STEP | Solomonbed wongkoon. O God, eb wengyundi ye kiwaan kuu king yaa kedmengkane. Ye kuu king ye mingki kowe ye yaa eb yorokmo kerekmen kuu kedmengkane.

Psalms 72

Yook 72

Solomonbed wongkoon.

1 O God, eb wengyundi ye kiwaan kuu king yaa kedmengkane.
Ye kuu king ye mingki kowe ye yaa eb yorokmo kerekmen kuu kedmengkane.
2 Kwaneewo ye kuu eb nimakarub yaa yorokmo kerekmen yaambed wengyundok,
kwane eb nimakarub yaa dabab wayiroondan kuu anammo wengyundok.
3 Kwane, aangko aangko angka kuu yewenubmo dobiri deedere wonok,
kwane koodbon koodbon kuu yorokmo dobiri ye yob irok.
4 King kuu dabab wayiroondan yaa koromone dakmok,
kwane ye kuu kamboknondan yi dana meed ben arud ye barang yaa dorondarok,
kwane ye kuu dabab kondi ye karub kan yob beengkemoon areb kerunok.
5 O God, aron yurembirimaun yaron kuu nimakarub kuu eb yaa une bumangkime,
wood angkimbirimaun yaron kui, awo awo andowoon anukbed mene aron yeenbon ari kui.
6 King kuu mongkobon angka am manauna kirod iremoon areb kerok,
kwane ye kuu okad ari am manauna aya nonga kainemoon areb kerok.
7 Ye dobaraneen yaron niindem aom kuu Godbed yorokmodan yaa yiminmo kerundok,
kwane yewenubmo dobiri kuu yi yaa yiminmo kerok, kwane wene wood kuu dowan keranuun.
8 Yembed oonaneen ye ambibkin kuu kwane karamok maambed wene maayiib nanduk,
kwane ok awaan Yufretesbed wene bid yimin wandaneen yaa keruk.
9 Amiibban ye amboon angka doriibdan kuu king yaa bumangkime,
kwane ye bondan kuu ye yaa bumangke korok ben kibingkenib ye dabderem yiri dobirime.
10 Taasisdan yi kingiib dudbi dudbi ku dangeendan yi kingdaniib kuu ooni ye kakman od kuu ye yaa bangkanime,
kwane Sibadan yi kingiib Sebadan yi kingiib kangkon nub yaa kubende andi ye munob koni yeman bangkanime.
11 Kingdan korem kuu ye yaa bumangkime,
kwane ambibkin korem kuu ye demedan kerime.
12 Kedi, awawe ande baandi ye karub kuu kingbed awanenaneen,
dabab wayiroondan kane kane yi yaa awandi ye karuwiibban kuyaa kui.
13 Kamboknondaniib yiminban kerenib awande andidaniib yaa kuu yembed mimyob keendaneen,
kwane yiminban kerenib awande andidan kuu yembed bobni yaa burudande bindaneen.
14 Yi kuu yembed yobdoodmo dabab bangkandidaniib yeremboromdaniib yaa dorenare bindaneen,
amborom kuu yi wadkeri kuu miin yekareb amun yeman ande meenimaan kowe.
15 Ye kuu weeb yemoon kwane doberemborok!
Kwane Siba ambibkin ye bot gold kuu ye yaa bangkanok.
Ye dowad nimakarub womoniyiibban aron korem kurikuri kamembirime.
Kwane aronki doboob kuu ye yaa amun kerunime.
16 Bidambib kumundin aom kuu wiit yob kuu yewudmo kerok.
Aangko aangko dungkun ari kwangkon awuune angkara kere angkara kere kamok.
Kuye wiid yob kuu Lebanon yu at yemoon areb yemoon kai kerok.
Kwane nimakarub kuu yi kambong aom kuu yidwarok,
kereekbon angka kuu kereek yemoon kwamune areb kerok.
17 Ye aningko kuu aron korem yirin kame angkimborok,
aron ku angkimbaranuun yaron ye doboob areb kuu kwane angkimborok.
Ye yaambed ambibkin koremdan kuu amun kerundok,
kwane yi kuu ye dowad ye kuu amun kerunoonman andime.
18 Yariman God, Israeldan yi God kui, ye yaa amun kerunok.
Yembedmo binangke ye yaa anam andi yeman ongmenabimaan.
19 Ye aningko nambiriyiib yaa amun kerunemborok, aron korem korem.
Kwane okad kumundin kiri kee ye nambiri kwane derendarok.
Anam kwanok. Anam kwanok.
20 Kwamune kumbed Yesi ye mingki Dewid ye kurikuri kame dowan keroon.